Марий Элысе 7-ше №-ан колоний-поселенийыштыже кок ий ончыч «Хитон» (грек йылме гыч «вургем» манын кусаралтеш) модо театрым почыныт.
Театр коллектив — декоративно-прикладной усталык кружокыш коштшо еҥ-влак. Кок ийыште ты коллектив тӱнямбал кӱкшытан конкурслаште лауреат лӱмым ик гана веле огыл налын.
Ончыч театрыште стилизоватлыме теле сценический костюм-влакым ямдыленыт. А тений Калыкын икоян улмо кечылан театр «Пеледышан полдыш» коллекцийже дене палдарен. Ты паша дене модо театр «Радуга над Кокшагой» тӱнямбал конкурсыш ушнаш ямдылалтеш.
«Пеледышан полдыш» коллекцийыште ончыч руш да марий калык-влак орнаментан вургем гына лийын. Колонийын клубыштыжо усталык мероприятий-влакым чӱчкыдын эртарат, садлан нине костюм-влак театральный постановкылан да художественный самодеятельность номерлан лач келшен толыныт.
Клубым вуйлатыше Ирина Цветкова ты идейым эшеат кумдаҥдаш шонен да, декоративно-прикладной творчество кружокыш коштшо-влакын кумылыштым шотыш налын, моло калык костюм эскиз-шамычым ямдылен. Ынде модо театрын колллекцийышкыже татар, пошкырт, чечня да чукча калык вургем-влак ешаралтыныт. Мотор вургем коллекцийым ямдылымаште колонийыште шинчыше-влак Наталья Баранова ден Милена Иванова чот тыршеныт. Нунак театральный представленийлаште чолгалыкым ончыктат.
Костюм-влак универсальный размеран улыт. Театрыш тӱрлӧ еҥ коштеш, икте эрыкыш лектеш, у еҥ-влак ешаралтыт. Кажне калык вургемым ямдылыме годым дизайнер-влак калык йӱлам шотыш налыныт. Нине костюмлам сценический образлан шотлыман, нуно Российысе иктаж калык костюмын исторический прототипше деч ойыртемалт кертыт.
«Хитон» модо театр «Радуга над Кокшагой» фестиваль конкурсышто ӱмаштат участвоватлен да лауреат лӱмым налын. Тений ты конкурс 3-11 декабрьыште лиеш, мероприятийым Марий кугыжаныш университет эртара.
Марий Элысе УФСИН гыч налме фото.